بھارت کا پاکستانی پانی کی فراہمی روکنا ’ایٹمی آبی جنگ‘ کی بنیاد رکھنے کے مترادف ہے، بلاول بھٹو
پاکستان پیپلز پارٹی ( پی پی پی ) کے چیئرمین اور پارلیمانی وفد کے سربراہ بلاول بھٹو زرداری نے واشنگٹن کے دورے کے دوران بھارت کی آبی جارحیت پر سخت موقف اپناتے ہوئے کہا ہے کہ بھارت کی جانب سے پاکستان کے پانی کی فراہمی روکنا ایٹمی آبی جنگ کی بنیاد رکھنے کے مترادف ہے۔
مڈل ایسٹ انسٹی ٹیوٹ سے خطاب کرتے ہوئے پارلیمانی وفد کے سربراہ بلاول بھٹو نے دو ٹوک الفاظ میں کہا کہ ’’ہم پہلے بھی واضح کر چکے ہیں کہ پانی کی ترسیل روکنا ہمارے لیے اعلانِ جنگ کے برابر ہوگا اور یہ کوئی اشتعال یا جذبات کی بات نہیں بلکہ ایک حقیقت پر مبنی سنجیدہ مؤقف ہے، اس میں کوئی خوشی پوشیدہ نہیں۔‘‘انہوں نے زور دیا کہ پاکستان اپنے پانی کے حقوق کے تحفظ کے لیے پرعزم ہے اور بھارت کی جانب سے سندھ طاس معاہدے کی خلاف ورزی یا پانی کی روک تھام کو کسی صورت برداشت نہیں کیا جائے گا۔
واشنگٹن میں میڈیا سے گفتگو
علاوہ ازیں واشنگٹن میں میڈیا سے گفتگو میں بلاول بھٹو زرداری کا کہنا تھا کہ پاکستان اور بھارت کے درمیان کشیدگی کے خاتمے کیلئے امریکی صدر ٹرمپ نے اہم کردار ادا کیا جبکہ پاکستان امن کا خواہاں ہے اور بھارت سے تمام معاملات پر بات چیت کیلئے تیار ہیں۔
