اگر کسی دفتر کی کامیابی کا راز جاننا ہو تو وہاں کے ایماندار، مستعد اور باصلاحیت عملے کو دیکھنا کافی ہوتا ہے۔
ایسے لوگ اداروں کی ریڑھ کی ہڈی کی حیثیت رکھتے ہیں، جو خاموشی سے، بغیر کسی نمود و نمائش کے، اپنے فرائض کو عبادت سمجھ کر سرانجام دیتے ہیں۔ غلام مرتضیٰ شیخ، جو اسسٹنٹ کمشنر آفس لیہ میں ہیڈ کلرک کی حیثیت سے خدمات انجام دے رہے ہیں، ایسے ہی افراد میں سے ایک روشن مثال ہیں۔
غلام مرتضیٰ شیخ ایک انتہائی باصلاحیت، دیانتدار اور محنتی شخصیت کے مالک ہیں۔ ان کا تعلق عام لوگوں سے ہے، لیکن ان کا کردار غیر معمولی ہے۔ انہوں نے اپنی قابلیت، خلوص، اور مستقل مزاجی سے جو مقام حاصل کیا ہے، وہ ہر کسی کے بس کی بات نہیں۔ دفتر میں ان کا رویہ نہایت شائستہ، خوش اخلاق اور پیشہ ورانہ ہوتا ہے۔ سینئر ہو یا جونئیر، ہر ایک کے ساتھ وہ مساوی عزت و احترام سے پیش آتے ہیں۔
ان کی شخصیت میں جو سب سے نمایاں پہلو ہے، وہ ان کی دوستی نبھانے کی صلاحیت ہے۔ غلام مرتضیٰ شیخ دوستوں کے دوست ہیں۔ جب بھی کسی دوست کو مشکل وقت کا سامنا ہو، وہ ہمیشہ سب سے پہلے مدد کے لیے ہاتھ بڑھاتے ہیں۔ ان کی مجلس میں بیٹھنے والے ہمیشہ ان کی خوش اخلاقی، برجستہ گفتگو اور سچائی سے متاثر ہوتے ہیں۔ وہ رشتوں میں مٹھاس، تعلقات میں مضبوطی اور دلوں میں اپنائیت کا جذبہ رکھتے ہیں۔
اسسٹنٹ کمشنر آفس جیسا حساس اور ذمہ دار ادارہ جہاں روزانہ ہزاروں نوعیت کے کاموں کی نگرانی ہوتی ہے، وہاں ہیڈ کلرک کی حیثیت سے کام کرنا صرف تجربے کا ہی نہیں، بلکہ صبر، بردباری اور حکمت کا بھی متقاضی ہوتا ہے۔ غلام مرتضیٰ شیخ نے اپنے فرائض کو نہایت جانفشانی اور ایمانداری سے نبھایا ہے۔ ان کی فائلوں میں ترتیب، کام میں مہارت، اور وقت کی پابندی ان کی پروفیشنلزم کا منہ بولتا ثبوت ہے۔
علاقے کے عوام میں بھی ان کے لیے عزت و محبت کے جذبات پائے جاتے ہیں۔ دفاتر میں آنے والے سائلین کے ساتھ ان کا برتاؤ نہایت خوش اخلاقی پر مبنی ہوتا ہے۔ وہ لوگوں کی بات سنتے ہیں، رہنمائی کرتے ہیں اور اپنی حد تک ہر ممکن مدد فراہم کرتے ہیں۔ یہی وجہ ہے کہ لوگ ان سے نہ صرف رہنمائی لیتے ہیں بلکہ ان پر اعتماد بھی کرتے ہیں۔
غلام مرتضیٰ شیخ ان لوگوں میں سے ہیں جو شور شرابے سے دور، خاموشی سے اپنی خدمات انجام دیتے ہیں۔ وہ شہرت کے پیچھے نہیں بھاگتے بلکہ کارکردگی سے پہچانے جاتے ہیں۔ یہی خوبی انہیں دوسروں سے ممتاز کرتی ہے۔
ایسے محنتی اور خلوص دل افسران ہمارے معاشرے کا اصل سرمایہ ہیں۔ اگر ہر محکمہ غلام مرتضیٰ شیخ جیسے افراد پر مشتمل ہو جائے تو یقین جانیں کہ بدعنوانی، سستی اور بدنظمی کا خاتمہ ہو جائے۔ ان کی خدمات قابلِ تعریف بھی ہیں اور قابلِ تقلید بھی۔
ہم دعاگو ہیں کہ اللہ تعالیٰ غلام مرتضیٰ شیخ کو صحت، عزت اور کامیابیوں سے نوازے اور وہ اسی طرح محنت، دیانت اور خلوص سے اپنا سفر جاری رکھیں۔ ادارے ان کے وجود سے منور رہیں اور عوام ان کی خدمات سے فیضیاب ہوتے رہیں۔ آمین
