اسلام آباد: صدر مملکت آصف علی زرداری اور وزیراعظم شہباز شریف نے خواتین کے عالمی دن کے موقع پر خواتین کو بااختیار بنانے کے عزم کا اعادہ کیا ہے۔ صدر زرداری نے اپنے پیغام میں کہا کہ خواتین معاشرتی، اقتصادی اور سیاسی ترقی میں اہم کردار ادا کر رہی ہیں اور قومی ترقی کے لیے انہیں بااختیار بنانا ناگزیر ہے۔ انہوں نے زور دیا کہ خواتین کو تعلیم، معاشی مواقع اور قائدانہ کردار دینا ہوگا تاکہ ایک ہمہ جہت اور مساوات پر مبنی معاشرہ تشکیل دیا جا سکے۔
وزیراعظم شہباز شریف نے بھی اپنے پیغام میں کہا کہ خواتین معاشرے کی تعمیر و ترقی میں اہم کردار ادا کر رہی ہیں اور انہیں بااختیار بنانا پاکستان کی خوشحالی کے لیے ضروری ہے۔ انہوں نے کہا کہ خواتین کی تعلیم، صحت اور معاشی آزادی میں سرمایہ کاری نہ صرف افراد بلکہ آنے والی نسلوں کو ترقی دیتی ہے۔
دونوں رہنماؤں نے اس بات پر زور دیا کہ پاکستان خواتین کے حقوق کے فروغ کے لیے پرعزم ہے اور اس سلسلے میں پالیسی سطح پر اقدامات کیے جا رہے ہیں۔ انہوں نے کہا کہ حقیقی صنفی مساوات کی طرف سفر ابھی جاری ہے اور اس کے لیے مزید کوششوں کی ضرورت ہے۔
خواتین کے عالمی دن کے موقع پر دونوں رہنماؤں نے ایک ایسے پاکستان کی تعمیر کے لیے اپنے عزم کا اعادہ کیا جہاں ہر عورت کی صلاحیتوں کا ادراک ہو اور ہر بیٹی کے خواب پورے ہوں۔
