لاہور: وزیر اطلاعات پنجاب عظمیٰ بخاری نے پریس کانفرنس کرتے ہوئے کہا کہ ملک میں دہشت گردی کی نئی لہر آئی ہوئی ہے اور پاک فوج کے جوان اپنے خون سے ملک کو بچا رہے ہیں۔ انہوں نے جعفر ایکسپریس واقعہ، نوشکی اور پشاور دھماکوں کی مذمت کرتے ہوئے کہا کہ حالیہ چند دنوں میں دہشت گردی کے متعدد واقعات پیش آئے ہیں۔
عظمیٰ بخاری نے کہا کہ دہشت گردی کے خلاف افواج پاکستان اور سکیورٹی ادارے کلیئرنس آپریشنز کر رہے ہیں اور جعفر ایکسپریس کے واقعہ میں چند گھنٹوں میں کلیئرنس آپریشن مکمل کیا گیا۔ انہوں نے بتایا کہ پاکستان دشمن عناصر سوشل میڈیا پر زہر آلود مہم چلا رہے ہیں، اور بھارتی میڈیا نے بھی اس واقعے کے حوالے سے مخصوص پراپیگنڈہ کیا ہے۔
