چوتھے ٹی ٹوئنٹی میں کیویز نے 115 رنز سے پاکستان کو شکست دے کر پانچ میچز کی سیریز میں فیصلہ کن برتری حاصل کرلی۔
نیوزی لینڈ کی ٹیم نے مقررہ 20 اوورز میں 6 وکٹوں کے نقصان پر 220 رنز اسکور کیے، جواب میں پاکستان کی پوری ٹیم 16.2 اوورز میں 105 رنز پر آؤٹ ہوگئی۔ماؤنٹ مینگنوئی میں کھیلے گئے میچ میں پاکستان کے کپتان سلمان علی آغا نے ٹاس جیت کر پہلے نیوزی لینڈ کو بیٹنگ کی دعوت دی۔
پاکستانی ٹیم میں محمد حارث، حسن نواز، سلمان علی آغا (کپتان)، محمد عرفان خان، شاداب خان، عبدالصمد، خوشدل شاہ، محمد عباس آفریدی، شاہین شاہ آفریدی، ابرار احمد اور حارث رؤف شامل تھے۔
5 ٹی ٹوئنٹی میچز کی سیریز میں میزبان نیوزی لینڈ کو تین ایک کی برتری حاصل ہوگئی اور یوں کیویز نے یہ سیریز جیت لی۔نیوزی لینڈ نے پہلے دو میچز میں پاکستان کو شکست دی تھی جب کہ تیسرے میچ میں پاکستان نے نیوزی لینڈ کو 9 وکٹوں سے شکست دی۔ اس میچ میں 22 سالہ بیٹر حسن نواز نے دھواں دھار سنچری بناکر بابر اعظم کا ریکارڈ توڑا تھا۔
پاکستان کے9 کھلاڑی ڈبل فیگر میں بھی داخل نہ ہوئے، عبدالصمد44رنزکےساتھ ٹاپ اسکورر رہے، رنز کے اعتبار سے پاکستان کوٹی ٹوئنٹی تاریخ کی بدترین شکست ہے۔
اس سے قبل کیویز نے میچ کا آغاز پاکستان کے خلاف جارحانہ بیٹنگ سے کیا اوپنر بلے باز ٹم سیفرٹ 44 رنز بناکر حارث روف کے بال پر کیچ آوٹ ہوگئے۔ فن ایلن نے 20 گیندوں پر 50رنزکی جارحانہ اننگز کھیلی۔ کیوی کپتان مائیکل بریسول نے26گیندوں پر46رنز بنائے۔
پاکستان کی جانب سے شاداب خان نے 4اوورز میں49رنز دیے، شاہین شاہ آفریدی کو4 اوورز میں49رنز کی مار پڑی، حارث رؤف3اور ابراراحمد نے2وکٹیں حاصل کیں۔
