سونے، تانبے کے بڑے ذخائر ریکوڈک کی فزیبلٹی اسٹڈی مکمل، 627 ملین ڈالر سرمایہ کاری کی تصدیق

او جی ڈی سی ایل کا اس منصوبے میں 8.33 فیصد حصہ ہے، جبکہ دیگر شریک ادارے پاکستان پٹرولیم لمیٹڈ (PPL) اور گورنمنٹ ہولڈنگز (GHPL) کے ساتھ مشترکہ حصہ 25 فیصد ہے۔ حکومت بلوچستان کا 25 فیصد حصہ اور باقی 50 فیصد حصہ بیریک گولڈ کارپوریشن کے پاس ہے، جو اس منصوبے کا آپریٹر بھی ہے۔

فزیبلٹی اسٹڈی کے مطابق، اس منصوبے کی کان کنی کا عمل 37 سال پر مشتمل ہوگا اور دو مرحلوں میں مکمل ہوگا۔ پہلے مرحلے کی لاگت 5.6 ارب ڈالر ہوگی اور یہ 2028 میں شروع ہوگا۔ اس میں 3 ارب ڈالر کا قرض لیا جائے گا جبکہ باقی رقم شیئر ہولڈرز فراہم کریں گے۔ اس کے پہلے مرحلے میں ہر سال 45 ملین ٹن خام میٹریل کی پروسیسنگ ہوگی، جبکہ دوسرے مرحلے میں یہ صلاحیت بڑھا کر 90 ملین ٹن سالانہ کر دی جائے گی۔

منصوبے سے 13.1 ملین ٹن تانبہ اور 17.9 ملین اونس سونا نکالنے کی توقع ہے، جو نہ صرف پاکستان کے زرعی اور معدنی وسائل کو بہتر بنائے گا بلکہ روزگار کے مواقع پیدا کرنے اور حکومتی آمدنی بڑھانے میں بھی مددگار ثابت ہوگا۔ او جی ڈی سی ایل کے بورڈ آف ڈائریکٹرز نے اس منصوبے کے لیے 627 ملین ڈالر کی سرمایہ کاری کو منظور کر لیا ہے، جس میں 349 ملین ڈالر شیئر ہولڈرز فراہم کریں گے اور باقی رقم قرض کے ذریعے حاصل کی جائے گی۔